Gazagystanyň Prezidenti Kasym-Žomart Tokaýewiň Aşgabada amala aşyran resmi saparynyň wekiliýetiniň düzümindäki ulag ministri Marat Karabaýew Türkmenistan bilen ulag ulgamyndaky hyzmatdaşlygy has-da ösdürjekdiklerini belledi. Bu barada Gazagystanyň resmi habarlar gullugy habar berýär.
Resmi saparyň çäklerinde ulag ulgamynda 4 resminama – 2 ähtnama we 2 hökümetara ylalaşygyna gol çekildi. Türkmenistan bilen Gazagystanyň arasynda göni howa gatnawlary ýola goýlar.
– Şeýle hem gol çekilen resminamalarda Transowgan geçelgesini bilelikde ösdürmek göz öňünde tutulýar. Bu geçelge Gazagystandan başlap, Türkmenistan, soňra Owganystanyň üsti bilen Pakistana, Pars aýlagyna we Hindi ummanyna çenli uzalyp gider – diýip, ulag ministri Marat Karabaýew belledi.
Mundan başga-da, iki ýurduň arasynda ulag we logistika ulgamynda strategik hyzmatdaşlyk ösdüriler.