Ispaniýanyň “Real Madrid” toparynyň brazil hüjümçisi Winisius Junior Halkara futbol federasiýasy (FIFA) tarapyndan 2024-nji ýylyň “Iň gowy futbolçysy” diýen ada eýe boldy. FIFA tarapyndan ýylyň jemlerine bagyşlanan baýrak gowşurylyş dabarasy Kataryň paýtagty Doha şäherinde geçirildi.
Ýylyň iň gowy futbolçysy baýragyna almak üçin Winisius bilen bir hatarda Daniel Karwahal, Federiko Walwerde, Jud Bellingem, Kilian Mbappe, Erling Holand, Rodri, Lamin Ýamal ýaly futbolçylar bäsleşdi.
Mälim bolşy ýaly, oktýabr aýynda Winisius “Altyn pökgi” baýragyny almak ugrundaky bäsleşikde ikinji orny eýeläpdy.
Brazil hüjümçi 2023-2024-nji möwsümi Ispaniýanyň “Real Madrid” topary bilen üstünlikli jemledi. Ispan topary Ispaniýanyň çempiony boldy, Çempionlar ligasynyň hem-de UEFA-nyň Superkubogyny gazandy.
FIFA tarapyndan bu baýrak 2016-njy ýyldan bäri gowşurylýar. Winisisu bu baýraga ilkinji gezek mynasyp boldy. Mundan ozal, bu baýraga 2 gezek Kristiano Ronaldo, Luka Modriç, Robert Lewandowski we 3 gezek Lionel Messi mynasyp bolupdy.
FIFA BOÝUNÇA BAÝRAGA MYNASYP BOLANLAR
- Şeýle hem Katarda geçirilen dabarada zenanlaryň arasynda iň goey futbolçy baýragyna “Barselona” toparynyň futbolçysy Aýtana Bonmati mynasyp boldy.
- 2024-nji ýylyň iň gowy tälimçisi Karlo Ançelotti boldy. Ol “Real” topary bilen geçen möwsümde uly üstünlikler gazandy.
- Iň owadan gol üçin berilýän Ferens Puşkaş baýragyna bolsa, “Mançester Ýunaýted” toparynyň argentin futbolçysy Alehandro Garnaço mynasyp boldy.
- Iň gowy derwezeçi baýragy ýene-de argentin derwezeçi Emiliano Martines berildi.
- “Fair Play” baýragy Braziliýanyň “Internasional” toparynyň ýarymgoragçysy Týago Maýýa gowşuryldy.