Türkmenistanyň ýygyndysy Merkezi Aziýa futbol assosiasiýasynyň (CAFA) futzal boýunça zenanlar ýygyndylarynyň çempionatynyň üçünji tapgyrynda Täjigistanyň ýygyndy toparyndan 1:0 hasabynda üstün çykdy. Ýygyndy toparymyza ýeňiş getiren ýeke-täk topy oýnuň 12-nji minutynda Maýa Musaskaýa öz adyna ýazdyrdy.
Üçünji tapgyryň beýleki oýnunda Eýranyň ýygyndy topary uly hasap bilen (10:0) gyrgyzystanly garşydaşlaryndan üstün çykdylar.
Türkmenistanyň ýygyndysy 4-nji tapgyrda Eýranyň ýygyndysy bilen güýç synanyşar.
Geçirilen oýunlardan soň 6 utuk toplan Eýranyň ýygyndysy birinji orny eýeleýär. 4 utukdan toplan Türkmenistanyň hem-de Gyrgyzystanyň ýygyndy toparlary degişlilikde ikinji, üçünji orunlarda ornaşdylar. Iki oýunda 3 utuk toplan Özbegistanyň ýygyndysy 4-nji, utugy bolmadyk Täjigistanyň milli ýygyndysy ýaryş tertibinde iň soňky orny eýeleýär.
Ýaryşa Gyrgyzystanyň, Eýranyň, Täjigistanyň, Türkmenistanyň hem-de Özbegistanyň ýygyndylary gatnaşýarlar. Aýlaw görnüşinde geçirilýän halkara ýaryşynyň ýeňijisi utuklaryň sany boýunça kesgitleniler.