2024-nji ýylyň 26 – 28-nji iýunynda Türkmenistanyň Söwda-senagat edarasynyň başlygynyň ýolbaşçylygyndaky ýurdumyzyň wekiliýeti Türki döwletleriň söwda-senagat edaralarynyň birleşiginiň maslahatyna gatnaşmak üçin Gyrgyz Respublikasynda iş saparynda boldy.
Halkara maslahata Türkmenistanyň wekiliýeti bilen bir hatarda Türki döwletleriň guramasyna agza döwletleriň, synçy-agza hökmünde gatnaşýan ýurtlaryň wekilçilikli toparlary gatnaşdylar. Ýeri gelende bellesek, Türkmenistanyň Söwda-senagat edarasy Türki döwletleriň söwda-senagat edaralarynyň birleşiginiň agzalygyna şu ýylyň mart aýynda kabul edildi. Ýurdumyzyň wekiliýeti bu mejlise guramanyň degişli birleşigine doly hukukly agza hökmünde ilkinji gezek gatnaşdy.
Nobatdaky forumyň çäklerinde söwda-ykdysady gatnaşyklary ösdürmek üçin türki döwletleriň söwda-senagat edaralarynyň arasynda hyzmatdaşlygy ösdürmegiň mümkinçilikleri ara alnyp maslahatlaşyldy.
Türki döwletleriň söwda-senagat edaralarynyň birleşigi we Gyrgyz Respublikasynyň Söwda-senagat edarasy bilen bilelikde guralan forumyň çäklerinde Türki döwletleriň guramasynyň halkara işewürlik maslahaty hem geçirildi.