Türkmenistandaky orta mekdepleriň 98 göteriminde interaktiw-multimediýa enjamlary bilen abzallaşdyrylan okuw otaglary bar. Bu barada «Türkmenistan» gazeti habar berdi.
Neşirde nygtalyşy ýaly, ýurtda hereket edýän Oba milli maksatnamasy ýurdumyzyň ähli künjeklerinde diňe bir mukdar däl, eýsem, hil görkezijileriniň hem ýokarlanmagyna getirdi. Täze desgalardyr binalar häzirki zaman tehnologiýalaryna daýanyp guruldy. Munuň netijesinde, öňki hereket eden durmuş we inženerçilik infrastrukturasynyň binalarynda hem-de desgalarynda halkara standartlara laýyk gelýän täze hojalyk birlikleri kemala geldi.
Mysal üçin, interaktiw-multimediýa enjamlary bilen abzallaşdyrylan okuw otaglary bolan umumybilim berýän orta mekdepleriň olaryň jemi sanyndaky paýy 98 göterime golaýlady. Mekdebe çenli çagalar edaralary üçin döwrebap enjamlaşdyrylan binalar guruldy. Oba ýerlerinde, şäherçelerde, etraplarda döwrebap, halkara standartlaryň ähli talaplaryna laýyk gelýän hassahanalaryň, saglyk öýleriniň ösen ulgamy kemala geldi.