Şu günler türkmen wekiliýeti Özbegistan Respublikasynyň Buhara şährinde gulluk iş saparynda bolýar.
Hormatly Prezidentimiziň gol çeken degişli resminamasyna laýyklykda, wekiliýetiň agzalary saparyň dowamynda Türkmen-özbek sebitara forumyna, Türkmenistanyň we Özbegistanyň Söwda-senagat edaralarynyň arasyndaky Işewürlik geňeşiniň mejlisine, Türkmenistanyň we Özbegistanyň önümçilik mümkinçilikleriniň sergisine, türkmen-özbek bilelikdäki dostluk konsertine gatnaşarlar.
Şu gün wekiliýetiň agzalary ertir – 13-nji iýulda Özbegistanyň taryhy şäherinde geçiriljek bilelikdäki çärelere taýýarlyk görmek işlerine girişdiler. Türkmen-özbek işewürlerini, meşhur sungat ussatlaryny bir ýere jemleýän çäreler iki doganlyk ýurduň arasyndaky söwda-ykdysady, medeni-ynsanperwer ugurlardaky gatnaşyklary has-da işjeňleşdirer.
Görnükli türkmen aýdymçylarynyň, «Serpaý», «Näzli» folklor we tans, «Güneş» sazandalar toparlarynyň gatnaşmagynda geçiriljek dostluk konsertiniň meýilnamasy halk aýdym-sazlarymyzyň, milli tanslarymyzyň, şeýle-de özbek halkynyň nusgawy sungatynyň eserlerini özünde jemleýär.