Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda paýtagtymyz Aşgabatdaky “Garagum” myhmanhanasynda Türki Döwletleriň Guramasynyň Aksakgallar geňeşiniň 15-nji maslahatynyň kiçi düzümdäki duşuşygy geçirildi.
“Watan” habarlar gepleşiginde bellenilip geçilişi ýaly, Türki Döwletleriň Guramasynyň Aksakgallar geňeşiniň 15-nji maslahatyna gatnaşmak üçin guramanyň agza we synçy döwletleriň aksakgallary paýtagtymyza geldi. Olaryň hatarynda Türki Döwletleriň Guramasynyň Aksakgallar geňeşiniň başlygy Binali Ýyldyrym we Türki Döwletleriň Guramasynyň Baş sekretary Kubanyçbek Ömüraliýew hem bar.
Türki Döwletleriň Guramasynyň Aksakgallar geňeşiniň 15-nji maslahatynyň kiçi düzümdäki duşuşygynda Türki Döwletleriň Guramasynyň Aksakgallar geňeşiniň başlygy Binali Ýyldyrym, Türki Döwletleriň Guramasynyň Baş sekretary Kubanyçbek Ömüraliýew, Gazagystanyň, Gyrgyz Respublikasynyň, Özbegistan Respublikasynyň we guramanyň synçy agzasy Wengriýanyň wekilleri çykyş etdiler.
Türkmen halkynyň Milli Lideri bu kiçi düzümdäki duşuşykda birnäçe teklipleri öňe sürdi. Türkmen halkynyň Milli Lideri Türki Döwletleriň Guramasynyň Aksakgallar geňeşiniň “Hormatly aksakgaly” diýen hormatly adyny döretmek, şeýle hem Türki Döwletleriň Guramasynyň Aksakgallar geňeşiniň redaksiýasyny, ýagny gazeti ýa-da žurnaly, şeýle hem web sahypasyny döretmegiň maksadalaýyk boljakdygyny belledi.
Türki Döwletleriň Guramasynyň Aksakgallar geňeşiniň 15-nji maslahatynyň kiçi düzümdäki duşuşygyndan soňra bu maslahatyň Oraza aýynda geçirilýändigi üçin agzaçar-sadakasy berildi.