Özbegistan 2022-nji ýylda Gazagystanyň we Türkmenistanyň portlary arkaly üstaşyr ýük daşamalaryny 2 esseden hem gowrak artdyrdy. Bu barada Özbegistanyň ulag ministriniň orunbasary Žasurbek Çoriýew Türki Döwletleriň Guramasynyň döwlet Baştutanlarynyň sammitiniň öňüsyrasynda geçirilen metbugat beýanatynda belläp geçdi.
– Statistiki maglumatlara görä, geçen ýylyň 9 aýy bilen deňeşdirilende, 2022-nji ýylda Özbegistan Türkmenistanyň we Gazagystanyň portlary arkaly ýük daşamalaryny 2 esse artdyryp, 337 müň tonnadan 701 müň tonna ýetirdi – diýip, ulag ministriniň orunbasary belläp geçdi.
Türki Döwletleriň Guramasynyň döwlet Baştutanlarynyň sammiti 11-nji noýabrda Samarkant şäherinde geçiriler. Özbegistanyň ýolbaşçysynyň bellemegine görä, sammitde ulag ulgamynda hyzmatdaşlyk etmek meýilnamasyna hem-de halkara garyşyk ýük daşamalary boýunça şertnama gol çekilmegine garaşylýar.