Her ýyl Bilimler we talyp ýaşlar güni mynasybetli täze bilim ojaklaryny ulanmaga tabşyrmaklyk ýurdumyzyň çar künjeginde bolşy ýaly, biziň welaýatymyzda-da asylly däbe öwrüldi. Şu gün hem Çärjew etrabynyň Hojaili geňeşliginiň Begaryk obasynda 400 orunlyk täze mekdep dabaraly ýagdaýda ulanmaga tabşyryldy.
Täze mekdebiň açylyş dabarasyna welaýat, etrap häkimlikleriniň, iri jemgyýetçilik guramalarynyň wekilleri, il sylagly ýaşulular, bilim, medeniýet işgärleri, oba ýaşaýjylary, okuwçylar, ata-eneler gatnaşdylar. Dabarada çykyş edenler ýaş nesliň zamanabap şertlerde bilim almagy, terbiýelenilmegi, ilhalar şahsyýetler bolup ýetişmegi barada irginsiz aladalanýan Milli Liderimize, hormatly Prezidentimize köp sagbolsun aýtdylar. Şu günki işe girizilýän bilim ojagy hem ýaş nesil barada edilýän oňyn aladalaryň miwesidir diýlip çykyşlarda nygtaldy.
Belentden ýaňlanýan aýdym-sazlaryň hoş owazy astynda toý bagy kesilip, il sylagly ýaşulular bu döwrebap desganyň açylmagyna ak pata berdiler hem-de täze okuw ýylynda mekdebiň mugallymlaryna, okuwçy ýaşlara bilimler äleminde üstünlikleri arzuwladylar. Soňra dabaranyň myhmanlary täze bilim ojagynyň synp, tejribe otaglaryna, sport meýdançasyna aýlanyp gördüler. «Ussa Tirkiş» hususy kärhanasynyň binagärleri tarapyndan desgalandyrylan iki gatly kaşaň ymaratda ýaşlaryň okamaklary, bilim almaklary üçin ähli amatlylyklar döredildi. Dünýäniň öňdebaryjy ýurtlarynyň ösen tehnologiýaly enjamlary ýaşlaryň hyzmatynda.