Şu ýylyň 6-njy oktýabrynda, ýagny ertir Russiýanyň Moskwa şäherinde Ikinji Hazar ykdysady forumy geçiriler. Oňa Russiýanyň Premýer-ministri Mihail Mişustin gatnaşar. Bu barada TASS habarlar gullugy habar berýär.
Forum “Skolkowo” innowasiýa merkezinde geçiriler. Bu foruma Russiýanyň Premýer-ministri Mihail Mişustin bilen bir hatarda Azerbaýjanyň Premýer-ministri Ali Asadow, Gazagystanyň Premýer-ministri Alihan Smailow, Eýranyň birinji wise-prezidenti Mohammad Mohber we Türkmenistanyň Ministrler Kabinetiniň Başlygynyň orunbasary Hojamyrat Geldimyradow gatnaşar.
Forumyň çäklerinde Hazarýaka döwletleriniň arasynda söwda-ykdysady we ylmy-tehniki hyzmatdaşlyga degişli meseleleriň giň toplumy ara alnyp maslahatlaşylar.
Şol bir wagtyň özünde ulag infrastrukturasy, energiýa, daşky gurşawy goramak, sebitara hyzmatdaşlygy hem-de medeni we ynsanperwer gatnaşyklary ösdürmek boýunça bilelikdäki taslamalara üns berler.