Soňky 5 ýyldan bäri Fransiýanyň meşhur baget çöregi boýunça Ginnesiň rekordyna eýelik edip gelýän ýurt, Fransiýa däl-de, Italiýadyr. Ýöne bu gezek fransuzlar öz çöregine eýe çykyp, dünýäniň iň uzyn baget çöregini taýýarladylar.
Fransiýanyň Pariž şäherinde 12 sany çörek bişiriji uzynlygy 140.53 metre, galyňlygy 5 santimetre deň bolan çöregi taýýarladylar we rekorduň eýesi boldular.
Mundan ozal, italiýalylar baget çöregini 122 metr uzynlykda taýaýrlapdy we 2015-nji ýylda Milan şäherinde geçirilen “EKSPO” sergisinde görkezilipdi.
Fransiýanyň çörek bişirijileri Ginnesiň rekordlar kitabyna girizilen baget çöregini bişirmek üçin azyndan 8 sagadyny sarp etdiler. Olar çöregi bişirmek üçin un, suw, duz we hamyrmaýa ulandylar.
Täze rekord Ginnesiň rekordlar kitabynyň eminler komiteti tarapyndan resmi taýdan hasaba alyndy.