Dubaýyň şazadasy Hamdan bin Muhammad bin Raşid Al Maktum Birleşen Arap Emirlikleriniň döredilmeginiň 48 ýyllygy mynasybetli «Skydive Dubai» paraşýutçylar topary bilen bilelikde rekord goýdy. Bu rekord Ginnesiň rekordlar kitaby tarapyndan hem bellige alyndy.
Rekord nähili goýuldy? Paraşýutçylar toparyna goşulan şazada Dubaýdaky «The Palm Jumeirah» emeli adasynyň üstünde howa giňişliginde 144 inedördül metrlik Döwlet baýdagyny galgatdy. Aslynda, rekord 18-nji noýabrda goýlupdy, ýöne şazada bu baradaky habaryň dünýä jemgyýetçiligine biraz giç berilmegini isledi.
Internetde rekordyň goýluşy baradaky wideogörnüşlere az salymda millionlarça adam tomaşa etdi. Şazadanyň özi tarapyndan paýlaşylan görnüşleriň gapdalynda: «Milli buýsanjymyz bilen ýene bir dünýä rekordy: 144,28 inedördül metrlik baýdagymyz BAE-niň Milli güni mynasybetli Dubaýyň asmanynda galgaýar» diýlen ýazgy galdyrylypdyr.