2026-njy ýylyň 3–5-nji noýabry aralygynda Aşgabat şäherindäki Türkmenistanyň Söwda-senagat edarasynda geçiriljek «Türkmenistanyň gurluşyk, senagat, himiýa we energetika pudaklarynyň ösüşi» (CIET 2026) atly halkara maslahata we sergä gatnaşmak üçin dünýäniň 60 ýurdundan 800-den gowrak wekil hasaba alyndy.
«Innowasiýalar. Maýa goýumlar. Ösüş.» diýen strategik şygar astynda geçiriljek çäre döwlet edaralarynyň, halkara kompaniýalaryň, maliýe guramalarynyň wekillerini, maýadarlary we tehnologiýa üpjün edijilerini bir ýere jemlär. Maslahatyň dowamynda senagaty döwrebaplaşdyrmak, infrastruktura ulgamyny ösdürmek we halkara ykdysady hyzmatdaşlygy giňeltmek meselelerine aýratyn üns berler.
Maslahatyň esasy ugurlarynyň biri energetika we himiýa senagatyny ösdürmek bolar. Bu ugurda maýa goýumlary çekmegiň, önümçiligiň netijeliligini ýokarlandyrmagyň, çig maly çuňňur gaýtadan işlemegiň hem-de ýokary goşulan gymmaty bolan bäsdeşlige ukyply önümleriň öndürilişini artdyrmagyň mümkinçilikleri ara alnyp maslahatlaşylar.
Infrastruktura bilen bagly meseleleriň çäklerinde häzirki zaman inženerçilik çemeleşmeleri, innowasion gurluşyk materiallary, binagärlik çözgütleri we ýol ulgamlaryny ösdürmek boýunça pikir alşylar. Gatnaşyjylar şäherleriň durnukly ösüşi, energiýadan netijeli peýdalanýan ulgamlar hem-de infrastruktura taslamalarynyň ekologik taraplary barada hem maslahatlaşarlar.
Maslahatyň maýa goýumlara bagyşlanan bölüminde içerki we halkara maýany çekmek, döwlet-hususy hyzmatdaşlygyny ösdürmek hem-de sebitleriň arasyndaky özara baglanyşygy pugtalandyrýan taslamalary durmuşa geçirmek meselelerine serediler. Telekeçiligi ösdürmek üçin amatly şertleri döretmäge we hususy pudagyň gatnaşygyny giňeltmäge aýratyn ähmiýet berler.
Sanly gurluşyk, «akylly şäher» çözgütleri we hünärmenleri taýýarlamak hem forumyň möhüm mowzuklarynyň hatarynda bolar. Gatnaşyjylar senagatyň we şäher infrastrukturasynyň geljekki ösüşinde döwrebap tehnologiýalaryň hem-de hünär başarnyklarynyň eýeleýän ornuny ara alyp maslahatlaşarlar.
Halkara maslahat bilen bir hatarda gurluşyk tehnikalarynyň, senagat tehnologiýalarynyň, inženerçilik çözgütleriniň, gurluşyk materiallarynyň we hyzmatlaryň halkara sergisi hem geçiriler.
Işewürlik duşuşyklarynyň dowamynda gatnaşyjylar bilelikdäki taslamalary durmuşa geçirmek, enjamlary ibermek we tehnologik hyzmatdaşlygy ýola goýmak boýunça pikir alyşmaga mümkinçilik alarlar.