Türkiýe Respublikasynda her ýylyň 21-27-nji maýy aralygynda “Türk aşhanasynyň hepdeligi” ady bilen türk tagamlaryny giňden wagyz etmek üçin dürli çäreler guralýar. Şeýle çäreler hem ýurduň çäginde hem-de daşary ýurtlardaky Türkiýäniň diplomatik wekilhanalarynda geçirilýär.
“Türk aşhanasynyň hepdeliginiň” çäklerinde Türkiýäniň Aşgabatdaky ilçihanasy tarapyndan çäre guraldy. Türkiýäniň Türkmenistandaky Adatdan daşary we Doly ygtyýarly ilçisi Ahmet Demirokyň gurnamagynda geçirilen çärä paýtagtymyz Aşgabatdaky daşary ýurtlaryň ilçileri, ýerli we daşary ýurtly habarçylar hem-de köp sanly myhmanlar gatnaşdy. Bu çärä “Ata Watan Media” topary hem çagyryldy.
Dabara çagyrylan myhmanlaryň hatarynda Türkmenistanyň medeniýet ministri atageldi Şamyrdow hem-de Türkmenistanda saparda bolýan Türkiýäniň ýokary bilim geňeşiniň ýolbaşçysy Erol Özwaryň ýolbaşçylygyndaky wekiliýet hem bar.
Ilçi Ahmet Demirok öz çykyşynda “Türk aşhanasy hepdeligi” çäreleriniň Türkiýäniň baý gastronomiýa medeniýetini dünýäde giňden wagyz etmäge mümkinçilik berýändigini belledi.
Türkiýe Respublikasynyň Prezidentiniň maşgalasy hanym Emine Ärdoganyň başlangyjy bilen ýola goýlan “Türk aşhanasy hepdeligi” çäreleriniň tutuş dünýäde giň gyzyklanma döredýär we türk tagamlaryny giňden beýan edýän “Köp asyrlyk reseptler bilen türk aşhanasy” kitabyna esaslanyp, türk tagamlary hödürlendi.
Dabarada bilelikdäki türkmen-türk mekdebiniň okuwçylary hem-de Türkmenistanyň Döwlet medeniýet merkeziniň Mukamlar köşgüniň sungat ussatlary çykyş etdi.