Türkmenistanyň «Awaza» milli syýahatçylyk zolagynda Garaşsyz Döwletleriň Arkalaşygyna agza döwletleriň milli tagamlarynyň festiwaly, halk senetleriniň we döwletleriň senagat hem-de oba hojalyk önümleriniň sergisi geçirildi. Oňa “Ata Watan Media” topary hem gatnaşdy.
Festiwalyň çäginde ýurtlaryň wekilleriniň milli burçlary döredildi. Olarda milli tagamlar, däp-dessurlar, adatlar, saçak bezegleri we myhmansöýerlik däpleri görkezildi.
Festiwala Türkmenistanyň Prezidenti Serdar Berdimuhamedow, Gazagystanyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistanyň Prezidenti Emomali Rahmon, Özbegistanyň Prezidenti Şawkat Mirziýoýew, Azerbaýjan Respublikasynyň Prezidenti Ilham Aliýew, Ermenistanyň Premýer-ministri Nikol Paşinýan hem-de GDA-nyň Baş sekretary Sergeý Lebedew gatnaşdy.
Bu ýerde Garaşsyz Döwletleriň Arkalaşygyna agza beýleki döwletleriň Baştutanlarynyň gatnaşmagynda GDA ýurtlarynyň sungat ussatlarynyň giň gerimli medeni maksatnamasy hem görkezildi.
Konsert maksatnamasy ýurtlaryň medeniýetiniň we sungatynyň iň gowy nusgalaryny görkezmek, GDA ýurtlarynyň arasynda medeni we döredijilik gatnaşyklaryny pugtalandyrmak maksady bilen guraldy we ajaýyp tomaşa öwrüldi.
Bu ajaýyp maksatnamada her bir gatnaşyjy ýurt medeniýetiň we milli sungatyň iň gowy nusgalaryny hödürläp, özüniň medeni keşbini görkezdi.
Bu çäre gatnaşyjylara Garaşsyz Döwletleriň Arkalaşygyna agza ýurtlaryň köpdürlüligi, ruhy baýlygy we milli däp-dessurlary bilen tanyşmaga mümkinçilik döretdi.