«Awaza» milli syýahatçylyk zolagynda geçirilen Merkezi Aziýa döwletleriniň we Azerbaýjanyň daşary işler ministrleriniň maslahaty geçirildi. Oňa Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, Gazagystanyň daşary işler ministri Muhtar Tlueberdi, Özbegistanyň daşary işler ministri Bahtiýor Saidow, Täjigistanyň daşary işler ministri Sirojiddin Muhriddin we Azerbaýjan Respublikasynyň daşary işler ministri Jeýhun Baýramow gatnaşdy.
Maslahatda daşary işler ministrlikleriniň ýolbaşçylary syýasy gatnaşyklary pugtalandyrmak, söwda we ykdysadyýet, ulag we aragatnaşyk, şeýle hem medeni-ynsanperwer ulgamlarda köptaraplaýyn hyzmatdaşlygy ösdürmek we çuňlaşdyrmak meselelerine garadylar.
Halkara gün tertibiniň möhüm meseleleri boýunça giňişleýin pikir alşyldy.
Ministrler Merkezi Aziýa döwletleriniň we Azerbaýjanyň Baştutanlarynyň nobatdaky Konsultatiw duşuşygynyň gün tertibiniň we jemleýji resminamalarynyň sanawynyň taslamalaryny ylalaşdylar.
Ministr Jeýhun Baýramow maslahatyň ýokary derejeli Sammitiň öňüsyrasynda geçirilmeginiň hyzmatdaşlygyň esasy ugurlary boýunça deslapky pikir alyşmalary geçirmek nukdaýnazaryndan ähmiýetini nygtady. Geçen ýyl Azerbaýjanyň Merkezi Aziýa döwletleriniň Baştutanlarynyň Konsultatiw duşuşygy formatyna doly hukukly agza hökmünde kabul edilmeginiň ýurtlaryyň arasyndaky taryhy we medeni baglanyşyklara, özara ynama we umumy strategik bähbitlere esaslanýan çuňňur integrasiýa prosesleriniň görkezijisidigi bellenildi.
Azerbaýjanyň ministri strategik ähmiýete eýe bolan ulag we energetika pudaklaryndaky hyzmatdaşlyga degip geçip, Gündogar bilen Günbataryň arasynda durnukly arabaglanyşyklaryň kemala gelmeginde we halkara söwdasynda Orta geçelgäniň barha artýan ornuny belledi. Şeýle hem ýaşyl energiýany öndürmek we geçirmek ulgamynda ýurtlarymyzyň arasynda ösýän strategik hyzmatdaşlygyň, şeýle-de ulag we sanly aragatnaşyk taslamalarynyň sebitiň mümkinçiliklerini doly durmuşa geçirmek üçin ähmiýeti nygtaldy.
Azerbaýjanyň bu formatyň pugtalandyrylmagyna we öňde goýlan wezipeleriň ýerine ýetirilmegine işjeň goşant goşmaga taýýardygy ýene-de bir gezek tassyklanyldy.