Gyrgyz Respublikasynyň Çolpon-Ata şäherindäki döwlet kabulhanasynda Merkezi Aziýanyň we Azerbaýjanyň döwlet Baştutanlarynyň resmi däl duşuşygy geçirildi. Oňa Türkmenistanyň Prezidenti Serdar Berdimuhamedow gatnaşdy.
Duşuşyga Gyrgyz Respublikasynyň Prezidenti Sadyr Žaparow, Azerbaýjan Respublikasynyň Prezidenti Ilham Aliýew, Gazagystan Respublikasynyň Prezidenti Kasym-Žomart Tokaýew, Täjigistan Respublikasynyň Prezidenti Emomali Rahmon hem-de Özbegistan Respublikasynyň Prezidenti Şawkat Mirziýoýew gatnaşýar.
Bu görnüşdäki duşuşyklar sebit hyzmatdaşlygyny ösdürmek, döwlet Baştutanlarynyň arasynda göni dialogy üpjün etmek we bilelikdäki çözgütleri işläp taýýarlamak üçin möhüm meýdança bolup hyzmat edýär.
2025-nji ýylda Daşkentde geçirilen Merkezi Aziýa döwletleriniň Baştutanlarynyň VII Konsultatiw duşuşygynda Azerbaýjan bu formata doly hukukly agza hökmünde kabul edildi. Bu çözgüt Merkezi Aziýa bilen Günorta Kawkazyň arasyndaky hyzmatdaşlygy giňeltmäge gönükdirilen möhüm ädim hökmünde baha berildi.
Täze giňeldilen format ýurtlaryň arasynda söwda-ykdysady, maýa goýum, ulag-logistika hem-de ynsanperwer gatnaşyklary ösdürmek üçin goşmaça mümkinçilikleri döredýär.
Azerbaýjanyň bu formata goşulmagy Merkezi Aziýa bilen Günorta Kawkazyň arasyndaky gatnaşyklary pugtalandyrmak, şol sanda ulag ugurlaryny ösdürmek we ykdysady hyzmatdaşlygy giňeltmek üçin täze mümkinçilikleri açýar.
Mundan başga-da, taraplar sebitde durnuklylygy, özara ynamy we uzak möhletleýin hyzmatdaşlygy berkitmäge gönükdirilen tagallalary dowam etdirmäge gyzyklanma bildirýärler.