2026-njy ýylyň 30-njy martynda Türkmenistanyň wekiliýetiniň Gruziýa bolan resmi saparynyň çäginde wekiliýetiň ýolbaşçysy, Türkmenistanyň Ministrler Kabinetiniň Başlygynyň orunbasary Nökerguly Atagulyýew bilen Gruziýanyň Premýer-ministri Irakliý Kobahidzeniň duşuşygy boldy.
N.Atagulyýew Türkmenistanyň Prezidenti Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň mähirli salamyny we iň gowy arzuwlaryny ýetirdi.
Duşuşygyň dowamynda taraplar iki ýurduň arasyndaky dostlukly gatnaşyklaryň we konstruktiw hyzmatdaşlygyň yzygiderli ösdürilýändigini kanagatlanma bilen bellediler. Şeýle hem köptaraplaýyn görnüşde, hususan-da, BMG-niň çägindäki üstünlikli hyzmatdaşlygyň ähmiýeti nygtaldy.
Duşuşyga gatnaşyjylar söwda-ykdysady, ulag-energetika we medeni-ynsanperwer ulgamlaryndaky hyzmatdaşlygy mundan beýläk-de ösdürmegiň möhüm meselelerini ara alyp maslahatlaşdylar. Syýasy gepleşikleri çuňlaşdyrmakda we ýurtlaryň arasyndaky ynamy berkitmekde ýokary derejeli saparlaryň esasy orny aýratyn bellenildi.
Duşuşygyň ahyrynda taraplar dürli derejelerdäki yzygiderli gatnaşyklary saklamaga, şeýle hem gazanylan ylalaşyklary iş ýüzünde durmuşa geçirmek boýunça yzygiderli işleri dowam etdirmäge taýýardyklaryny tassykladylar.