2026-njy ýylyň 27-nji fewralynda Baku şäherinde Türkmenistanyň we Azerbaýjan Respublikasynyň daşary syýasat edaralarynyň arasynda geňeşmeler geçirildi.
Taraplaryň wekiliýetlerine Türkmenistanyň Daşary işler ministriniň orunbasary A.Gurbanow we Azerbaýjanyň Daşary işler ministriniň orunbasary S.Şarifow ýolbaşçylyk etdiler.
Geňeşmeleriň dowamynda taraplar ikitaraplaýyn hyzmatdaşlygyň giň gerimli meselelerine, şeýle hem sebit we halkara gün tertibiniň möhüm ugurlaryna seretdiler. Syýasy-diplomatik gepleşikleri ösdürmäge, söwda-ykdysady hyzmatdaşlygy artdyrmaga, ulag-logistika we energetika ulgamlaryndaky gatnaşyklara, şeýle hem medeni-ynsanperwer gatnaşyklary berkitmäge aýratyn üns berildi.
Iň ýokary derejedäki gepleşikleriň we duşuşyklaryň Azerbaýjan bilen Türkmenistanyň arasyndaky hyzmatdaşlygy pugtalandyrmagyň esasy şertidigi bellenildi. Şunlukda, öňde boljak ýokary derejeli çäreleriň taýýarlyk we geçiriliş meseleleri ara alnyp maslahatlaşyldy.
Şeýle hem parlamentara hyzmatdaşlygyň ikitaraplaýyn gatnaşyklary ösdürmekde, institusional baglanyşyklary berkitmekde we ýurtlaryň arasyndaky hyzmatdaşlygy giňeltmekde netijeli gural hökmündäki ähmiýeti nygtaldy.
Ykdysady hyzmatdaşlyk boýunça Hökümetara türkmen-azerbaýjan toparynyň bilelikdäki başlangyçlary utgaşdyrmakda we ilerletmekde esasy orun eýeleýändigi bellenildi. Işewür toparlaryň arasyndaky gatnaşyklary ösdürmek, telekeçileriň göni aragatnaşygyny giňeltmek we haryt öndürijileriň milli sergilerini guramak hem möhüm ugurlar hökmünde ykrar edildi.
Aziýanyň we Ýewropanyň çatrygynda ýerleşýän Türkmenistanyň we Azerbaýjanyň ulag-üstaşyr ulgamyndaky hyzmatdaşlygy pugtalandyrmak we halkara ulag geçelgelerini amala aşyrmak üçin strategik mümkinçilikleri bardygy aýratyn bellenildi.
Taraplar söwda-ykdysady gatnaşyklary diwersifikasiýa ýoly bilen ösdürmäge, şol sanda täze geljegi uly ugurlarda hyzmatdaşlygy ýola goýmaga gyzyklanma bildirdiler. Şeýle hem iki halkyň arasyndaky dostlugy we özara düşünişmegi berkitmekde medeni-ynsanperwer gatnaşyklaryň ähmiýeti nygtaldy.
Bilim we ylym ulgamyndaky hyzmatdaşlygy, şol sanda akademiki alyş-çalyşlary we ýokary okuw mekdepleriniň arasyndaky hyzmatdaşlygy giňeltmäge aýratyn ähmiýet berildi.
Duşuşygyň netijeleri boýunça taraplar hyzmatdaşlyk gatnaşyklaryny mundan beýläk-de çuňlaşdyrmaga özara gyzyklanmalaryny we ähli ugurlar boýunça konstruktiw gepleşikleri dowam etdirmäge taýýardyklaryny tassykladylar.