Doganlyk ýurdumyz Türkmenistan bilen ykdysady we söwda gatnaşyklarymyz her ýyl ösýär. Geçen ýyl özara söwdanyň möçberi 2,2 milliard dollara ýetdi we iki ýurduň döwlet Baştutanlary tarapyndan özara söwdanyň möçberini 5 milliard dollara ýetirmek babatda öňde goýan wezipelerine ýetmek üçin ähli güýjümiz bilen işleýäris – diýip, Türkiýäniň söwda ministri Ömer Bolat Aşgabatda geçirilen Türkiýe Respublikasynyň eksport harytlarynyň Aşgabatda geçirilýän sergisiniň açylyş dabarasynda eden çykyşynda belledi.
– Biz Türkmenistanyň infrastrukturasyna, ykdysady ösüşine we döwrebaplaşdyrylmagyna, şeýle hem potratçylyk pudagynda senagata goşýan goşantlarymyz bilen buýsanýarys. Bu babatda doganlyk ýurdumyz Türkmenistana minnetdarlyk bildirýäris. – diýip, bellän söwda ministri häzirki güne çenli 1,156 milliard dollarlyk taslamalar üstünlikli tamamlanandygyny, häzirki wagtda energetika, saglygy goraýyş we himiýa pudaklarynda möhüm taslamalar dowam edýändigini belledi.
– Şol bir wagtyň özünde türk kompaniýalarynyň Türkmenistanda maýa goýumlary 310 million dollardan geçýär. Hyzmat pudagynda Türkiýe bilen Türkmenistanyň arasyndaky söwdanyň möçberi ýyllyk 180 million dollara deňdir – diýip ministr belledi.