2025-nji ýylyň 22-nji sentýabrynda BMG-niň Baş Assambleýasynyň 80-nji sessiýasynyň çäklerinde Türkmenistanyň daşary işler ministri Raşid Meredow bilen BMG-niň syýasy meseleler boýunça Baş sekretarynyň orunbasary hanym Rozmari Dikarlo duşuşdy.
Söhbetdeşligiň dowamynda taraplar Türkmenistanyň BMG ulgamyndaky hyzmatdaşlygynyň esasy ugurlaryny, hususan-da, parahatçylygy saklamak we halkara howpsuzlygyny berkitmek meselelerini ara alyp maslahatlaşdylar.
Şeýle hem öňüni alyş diplomatiýasynyň ösdürilmegine aýratyn üns berildi, şol sanda Merkezi Aziýa üçin BMG-niň öňüni alyş diplomatiýasy boýunça sebit merkeziniň işi we sebitleýin hyzmatdaşlyk mehanizmleriniň berkidilmegi boýunça pikir alşyldy.
Döwletleriň arasyndaky özara ynamy pugtalandyrmaga hem-de konstruktiw halkara dialogyny ösdürmäge gönükdirilen Türkmenistanyň başlangyçlary, şol sanda 2025-nji ýylyň Halkara parahatçylyk we ynanyşmak ýyly diýip yglan edilmegi aýratyn bellenildi.
Şol başlangyçlaryň çäginde BMG-niň Baş Assambleýasynyň 80-nji sessiýasynyň gün tertibine «Bitaraplyk — parahatçylyk we howpsuzlygyň hatyrasyna» atly mesele girizildi. Onuň çäklerinde «Halkara parahatçylygy, howpsuzlygy we durnukly ösüş prosesini saklamakda we berkitmekde bitaraplyk syýasatynyň orny we ähmiýeti» hem-de «Halkara araçylyk güni» atly Kararnama taslamalarynyň garalmagyna garaşylýar.
Söhbetdeşler şeýle hem sebitleýin we dünýä derejesindäki aktual meseleleriň giň toplumy boýunça pikir alyşdylar.