Owganystanyň demirýol ulaglary boýunça jemgyýetçilik işlerine gözegçilik edýän ministriň orunbasary Mohammad Ishak Sahibzade ýolbaşçylygyndaky tehniki wekiliýet Türkmenistanda saparda boldy. Bu barada owgan metbugaty habar berýär.
Owganystanyň demirýol edarasy bilen Türkmenistanyň “Türkmendemirýollary” agentiliginiö arasynda ylalaşylan ähtnamalara laýyklykda,
- Turgundi demirýol stansiýasyny giňeltmek
- Akina-Andhoý demirýolunyň 10 kilometrlik böleginiň gurluşygyny tamamlamak
- 55 kilometrlik Andhoý-Şibergan demirýol liniýasynyň gurluşygy üçin tehniki-ykdysady esaslanmalary işläp düzmek ýaly işler geçiriler.
Ýakyn döwürde gazanylan ähtnamalara laýyklykda, anyk şertnamalara gol çekilip, taslamalary iş ýüzünde durmuşa geçirmäge girişmek göz öňünde tutulýar.
Türkmenistan köp ýyllardan bäri Owganystanyň demirýol ulgamynyň döwrebaplaşdyrylmagyna özüniň saldamly goşandyny goşup gelýär. Häzirki wagtda Turgundi demirýol stansiýasynyň çäklerinde ammar toplumynyň, şeýle hem Türgundi-Hyrat demirýolunyň birinji bölegi bolan 22 kilometrlik Turgundi-Sanabar ugrunyň gurluşygy alnyp barylýar.