Polşanyň paýtagty Warşawa şäherinde Türkmenistan bilen Polşanyň Daşary işler ministrlikleriniň arasynda syýasy geňeşmeler geçirildi. Türkmen tarapyna daşary işler ministriniň orunbasary Ahmet Gurbanow, polşa tarapyna bolsa, daşary işler ministriniň orunbasary Marek Prawda ýolbaşçylyk etdi.
Geňeşmeleriň barşynda taraplar syýasy, diplomatik, söwda, ykdysady, medeni we ynsanperwer ugurlardaky gatnaşyklar barada pikir alyşdylar. Türkmenistan-Polşa hyzmatdaşlygyny pugtalandyrmaga özara üns berýändiklerini tassykladylar.
Şol bir wagtyň özünde, söwda, ykdysady we durmuş ugurlaryndaky hyzmatdaşlygy giňeltmäge we hukuk binýadyny gowulandyrmaga ünsi jemläp, dürli ugurlarda özara peýdaly hyzmatdaşlygy güýçlendirmek baradaky özara ygrarlylyk tassyklandy. Türkmenistan bilen Polşanyň arasynda ykdysady hyzmatdaşlyk boýunça iş toparyny döretmegiň mümkinçiliklerini öwrenmek teklip edildi.
Duşuşygyň çäginde syýasy we diplomatik ugurda bilelikdäki işleri has-da güýçlendirmek maksady bilen 2025-2026-njy ýyllar üçin Türkmenistan we Polşanyň Daşary işler ministrlikleriniň arasynda hyzmatdaşlyk maksatnamasyna gol çekildi.
Şol gün Türkmenistanyň daşary işler ministriniň orunbasary Ahmet Gurbanow bilen Demirýollary (OSJD) hyzmatdaşlyk guramasynyň başlygy Miroslaw Antonowiçiň arasynda duşuşyk geçirildi. Duşuşykda taraplar ikitaraplaýyn hyzmatdaşlygyň geljegi uly ugurlaryny ara alyp maslahatlaşdylar.