Russiýanyň Prezidenti Wladimir Putin 4-nji dekabrda Russiýa Federasiýasyna täze bellenen 21 döwletiň ilçileriniň ynanç hatlaryny kabul eder. Bu barada Russiýanyň Prezidentiniň metbugat gulugy habar berdi.
Habar berlişine görä, “2023-nji ýylyň 4-nji dekabrynda Russiýanyň Prezidenti 21 döwletiň ilçilerinden ynanç hatlaryny kabul eder” – diýlip bellenilýär.
Russiýa täze bellenen ilçileriň hatarynda Türkmenistan döwletimiziň hem ilçisi bar. Mälim bolşy ýaly, golaýda Esen Aýdogdyýew Türkmenistanyň Russiýa Federasiýasyndaky Adatdan daşary we Doly ygtyýarly ilçisi wezipesine bellenipdi.
Türkmenistan bilen bir hatarda Germaniýanyň, Beýik Britaniýanyň, şeýle hem Awstraliýanyň, Alžiriň, Burundiniň, Gamibiýanyň, Gresiýanyň, Dominikanyň, Gazagystanyň, Kuweýtiň, Lýuksemburguň, Mawritaniýanyň, Maliniň, Pakistanyň, Koreýa Respublikasynyň, Singapuryň, Sloweniýanyň, Türkiýäniň, Şwesiýanyň we Efiopiýanyň täze bellenen ilçileri Kreml köşgüniň Aleksandrowsk zalynda kabul ediler.
Ynanç hatlaryny gowşurmak dabarasy täze ilçileriň diplomatik işleriniň Russiýada başlanýandygyny alamatlandyrýar. Şeýle çäreler yzygiderli geçirilýär we soňky gezek aprel aýynda bolupdy.
Bu dabaralarda ýurduň Prezidenti daşary ýurtly ilçileriň öňünde çykyş edýär we döwletler bilen Russiýanyň arasyndaky ikitaraplaýyn hem-de köptaraplaýyn gatnaşyklara baha berýär.