Şu gün Türkmenistanyň Prezidenti Serdar Berdimuhamedow bilen Türkiýe Respublikasynyň Prezidenti Rejep Taýyp Ärdoganyň arasynda ýokary derejeli gepleşikler geçirildi. Bu duşuşygyň dostlukly ýurduň milli baýramynyň — Respublikanyň döredilmeginiň 100 ýyllygynyň bellenilýän günlerine gabat gelmegi özboluşly mana eýedir.
Ankara şäherinde geçirilen gepleşiklerden soňra iki ýurduň döwlet Baştutanlary metbugat wekillerine ýüzlendi.
Prezidenti Ärdogan Türkmenistan bilen energetika pudagyndaky hyzmatdaşlyga ünsi çekip şeýle diýdi.
– Energetika taýdan Türkmenistan sebitde we dünýäde öňdebaryjy ýurtlaryň hataryndadyr. Häzirki wagtda Türkmenistanyň tebigy gazynyň Türkiýä we dünýä bazarlaryna Türkiýäniň üsti bilen iberilmegi aýratyn strategiki ähmiýete eýe boldy. Bu ugurda Türkmenistan bilen ikitaraplaýyn hyzmatdaşlyk we Azerbaýjanyň gatnaşmagy bilen üç taraplaýyn hyzmatdaşlyk möhümdir – diýip, Ärdogan belledi.
Türkmenistanyň Prezidenti hem öz gezeginde Türkiýäniň Prezidenti bilen Türkmenistanyň elektrik energiýasyny we tebigy gazyny Hazar deňziniň üsti bilen Türkiýä iberilmegi meselesini ara alyp maslahatlaşandyklaryny mälim etdi.