Duşanbe şäherinde geçirilýän Merkezi Aziýa döwletleriniň Baştutanlarynyň bäşinji konsultatiw duşuşygynda çykyş eden Gazagystan Respublikasynyň Prezidenti Kasym-Žomart Tokaýew sebit ýurtlarynyň arasyndaky söwda-ykdysady hyzmatdaşlygy ösdürmäge gönükdirilen birnäçe teklipleri beýan etdi.
Gazak Lideri hususan-da, söwda-ykdysady hyzmatdaşlygy ösdürmek hem-de özara söwda dolanyşygyny 15 milliard dollara ýetirmek mümkinçiliginiň bardygyny belläp, hususy pudagyň wekilleriniň arasynda gatnaşyklary guramak üçin, haryt öndürijileriniň bitewi elektron maglumat ulgamyny döretmegi teklip etdi.
Şeýle hem azyk, ýeňil önümler, gurluşyk we himiýa senagaty üçin toparlaýyn kooperatiw taslamalaryny döretmek ägirt uly mümkinçiliklere eýedigini belläp, munuň üçin Merkezi Aziýa döwletleriniň arasynda senagat hyzmatdaşlygyny ösdürmek üçin Hereket meýilnamasyny düzmegiň möhüm bolup biljekdigini belledi.
Gazagystanyň Prezidenti 2024-nji ýylda Gazagystanda howpsuzlyk geňeşiniň sekretarlarynyň derejesinde Merkezi Aziýanyň howpsuzlyk we hyzmatdaşlyk dialogyny geçirmegi teklip etdi.
Kasym-Žomart Tokaýew bilelikdäki media taslamalary durmuşa geçirmek üçin umumy sebitleýin teleýaýlymy, habarlar internet saýtyny döretmek teklibini beýan etdi.