Wengriýada iş saparynda bolýan Türkmenistanyň Prezidenti Serdar Berdimuhamedow ýeňil atletikada möhüm waka— Merkezi Ýewropada ilkinji gezek geçirilýän dünýä çempionatynyň 100 metr aralyga ylgamak boýunça ýaryşynyň final tapgyrynyň hormatly myhmany boldy.
Ýeňil atletika boýunça dünýä çempionatynyň ýaryşlary Wengriýanyň paýtagty Budapeşt şäherindäki Milli atletika merkezinde geçirilýär. Bu ýaryşa tomaşa etmek üçin Wengriýanyň Premýer-ministri Wiktor Orbanyň çakylygy boýunça Azerbaýjanyň Prezidenti Ilham Aliýew, Türkiýe Respublikasynyň Prezidenti Rejep Taýyp Ärdogan, Özbegistan Respublikasynyň Prezidenti Şawkat Mirziýoýew, Gyrgyz Respublikasynyň Prezidenti Sadyr Žaparow, Katar Döwletiniň Emiri Şeýh Tamim bin Hamad Al Tani, Russiýa Federasiýasynyň Tatarystan Respublikasynyň Baştutany Rustam Minnihanow, Serbiýa Respublikasynyň Prezidenti Aleksandr Wuçiç we beýleki köp sanly ýokary derejeli myhmanlar Budapeşt şäherine geldiler.
Ýeňil atletika boýunça dünýä çempionaty ilkinji gezek Budapeşt şäherinde geçirilýär. Bu ýaryş 19-njy awgustda badalga aldy we 27-nji awgusta çenli dowam eder.
Wengriýanyň kabul edýän iň uly ýaryşlarynyň biri bolan bu çempionata 200-den gowrak döwletden 2000-den gowrak türgen gatnaşýar.