Düýn paýtagtymyz Aşgabadyň adybir “Aşgabat” kinoteatrynda “Russian Film Festival” ady bilen rus kinolarynyň hepdeligi başlady. Bu taslama Türkmenistanyň we Russiýanyň Medeniýet ministrlikleri tarapyndan goldanylyp, Russiýanyň Türkmenistandaky ilçihanasynyň, “Roskino” hem-de “Rossotrudniçestwo” edaralarynyň gurnamagyna geçirilýär.
Hepdeligiň çäklerinde görkeziljek filmleri maşgala bolup görmek mümkinçiligi bardyr. Bu döwürde dürli filmler, multfilmler hem-de animasion filmler görkeziler.
Kino hepdeliginiň açylyş dabarasynda çykyş eden Russiýanyň Türkmenistandaky ilçihanasynyň birinji sekretary we “Rossotrudniçestwo” edaralarynyň Türkmenistandaky wekili Ýuliýa Zaýsewa bu çäräniň 12-nji iýunda bellenilip geçilýän milli baýram – Russiýanyň gününe bagyşlanyp geçirilýändigini belledi.
Şeýle hem ol “Aşgabat” we “Berkarar” kinoteatrlarynda filmleriň mugt görkeziljekdigini aýdyp, munuň Russiýa Federasiýasynyň Türkmenistanyň ýaşaýjylaryna we onuň myhmanlaryna sowgady bolup durýandygyny mälim etdi.