Türkmenistanyň futbol boýunça zenanlar topary 2024-nji ýylda Parižde geçiriljek Olimpiýa oýunlaryna saýlama ýaryşa ilkinji gezek gatnaşar.
Pariž – 2024 Olimpiadasyna Aziýadan zenanlar toparlarynyň arasynda saýlama oýunlara iň kän – 31 ýygyndy gatnaşar. Olardan 26-sy ýaryşyň birinji tapgyrynda 7 toparça bölüner. 5 toparçanyň hersinde dört, ikisiniň hersinde 3 topar bolar.
Aziýada Olimpiada zenanlar toparlarynyň saýlama oýunlarynyň birinji tapgyry 2023-nji ýylyň 3 – 11-nji aprelinde bir aýlawda merkezleşdirilen düzgünde geçiriler.
Kamil Mingazow ýurdumyzyň milli we ýaşlar (U-20) ýygyndylarynyň baş tälimçisi hökmünde türkmen futbolçy zenanlaryny ýylyň bu wajyp ýaryşyna taýýarlar.
Türkmenistanyň Futbol federasiýasy 2023-nji ýylda onuň bilen şertnamany uzaltdy. 54 ýaşly bu zehinli hünärmen Türkmenistanyň zenanlar ýygyndysynda 2016-njy ýyldan bäri netijeli işläp gelýär. 2017-nji ýylda zenalar toparymyzy Aşgabatda geçirilen Ýapyk binalarda we söweş sungaty boýunça V Aziýa oýunlarynyň futzal ýaryşyna, şondan bir ýyl soň bolsa Bangkokda geçen futzal boýunça Aziýa çemňionatyna saýlama ýaryşa ilkinji gezek gatnaşypdy.
2023-nji ýylda türkmen zenan futbolçylary has köp ýaryşa gatnaşarlar. Olimpiýa oýunlary-2024-e saýlama oýunalrdan başga-da, zenanlar toparlarymyz gyzlaryň arasynda U-20 we U-17 Aziýa çempionatyna saýlama oýunlara gatnaşarlar, olar degişlilikde mart aýynda Bangladeşde hem-de aprelde Singapurda geçiriler.