Oguzhan adyndaky «Türkmenfilm» birleşigi iledeşlerimiz üçin Täze ýyl baýramy üçin sowgatlary taýýarlaýar. Iki sany gysga film – W.Işangulyýewiň «Täze ýyl» aýdym-sazly komediýasy we K.Garaýewiň «Täze ýyl şowhuny» atly filmi taýýarlady. Bu filmleri milli telewideniýe boýunça tomaşaçylara görkezmek meýilleşdirilýär. Bu barada «Türkmenistan: Altyn asyr» saýtynda bellenilip geçilýär.
Türkmen kinematografçylarynyň döredijilik bukjasynda başga taslamalar hem az däl, şu günler olaryň üstünde köp işler alnyp barylýar. Bular öňden gelýän milli gymmatlyklar baradaky üç sany dokumental filmdir. Olaryň biri türkmen alabaýy, ikinjisi alaja, üçünjisi bolsa gadym döwürlerden bäri mukaddes saýylyp, belent tutulýan çörek bişirilýän tamdyr hakynda gürrüň berýär.
«Hüýrlukga – Hemra» dessanynyň film edilmegi-de, türkmen halkynyň ruhy gymmatlyklarynyň halk arasynda ýaýradylmagyna hyzmat edýär. Dessanyň gyzyklylygy we umumy ynsanperwer ugry onuň diňe bir türkmen halkynyň arasynda däl, eýsem Merkezi Aziýanyň beýleki halklarynyň arasynda-da, giň meşhurlygyny şertlendirdi. Oguzhan adyndaky «Türkmenfilm» birleşigi ýakyn geljekde «Rowaýat» we «Gyzyl alma» atly taryhy gysga filmleri-de tomaşaçylara hödürlemäge taýynlanýar.