2021-nji ýylda Russiýanyň “Gazprom” kompaniýasy Türkmenistandan 10,6 milliard kubmetr möçberinde tebigy gaz satyn aldy. Bu barada Russiýa Federasiýasynyň Prezidentiniň kömekçisi Ýuriý Uşakow brifingde habar berdi.
“Interfaks” habarlar gullugynyň habar bermegine görä, şertnama laýyklykda, “Gazprom” kompaniýasy bilen “Türkmengaz” döwlet konserni 2019-njy ýylyň 1-nji iýulynda 5 ýyllyk möhlet bilen – 2024-nji ýylyň 30-njy iýuny boýunça ýyllyk 5,5 milliard kubmetre çenli tebigy gaz almak babatda ylalaşyk baglaşypdy.
Bu hereket edýän şertnama boýunça Türkmenistanyň tebigy gazyny satyn almak we bu ulgamda uzakmöhletleýin esasda hyzmatdaşlyk etmek meseleleri “Gazprom” kompaniýasynyň ýolbaşçysy Alekseý Milleriň golaýda Türkmenistana amala aşyran saparynda ara alnyp maslahatlaşylypdy.