Germaniýanyň milli ýygyndysynyň hüjümçisi Timo Werner Angliýanyň “Çelsi” toparyndan Germaniýanyň “Leýpsig” toparyna gaýdyp geldi. Bu barada nemes toparynyň metbugat gullugy habar berýär.
Nemes topary ozalky futbolçysy bilen 4 ýyllyk şertnama baglaşar. 26 ýaşyndaky Werner “Leýpsig” toparyndan “Çelsi” toparyna 2020-nji ýylda geçipdi. Ol iňlis toparynyň düzüminde Çempionlar ligasynyň ýeňijisi, UEFA-nyň Superkubogynyň we klublaryň dünýä çempionatynyň çempiony bolupdy.
Werner “Çelsi” toparynyň düzüminde 89 duşuşykda oýnap, 23 gol geçirdi. Ol Germaniýanyň “Leýpsig” toparynda bolsa, 2016-2020-nji ýyllar aralygynda oýnap, 156 duşuşykda 90 gezek tapawutlanypdy. Werneriň ilkinji professional topary Germaniýanyň “Ştutgart” topary bolupdy.
Ol Germaniýanyň ýygyndysynyň düzüminde 53 duşuşykda 24 gol geçirdi. Ol 2017-nji ýylda ýygyndy bilen Konfederasiýa kubogyny gazanypdy.