Mälim bolşy ýaly, dünýäniň iň abraýly sport ýaryşy hasaplanýan we 4 ýylda bir gezke geçirilýän tomusky Olimpiýa oýunlary 2024-nji ýylda Fransiýanyň Pariž şäherinde geçirilýär.
Pariž şäherinde geçiriljek Olimpiýa oýunlarynyň şygary we sport ýaryşlarynyň biletleriniň bahasy mälim edildi. Olimpiýa oýunlarynyň guramaçylyk komitetiniň habar bermegine görä, Olimpiýa oýunlarynyň şygary “Geliň, oýunlary has giňden açalyň” diýlip yglan edildi.
Şol şygar Paralimpiýa oýunlarynda hem ulanylar.
BILETLERIŇ BAHASY
Halkara Olimpiýa komiteti tomusky Olimpiýa oýunlarynyň biletleriniň bahasyny mälim etdi. 10 milliona golaý biletiň satylmagy göz öňünde tutulýar. Pariždäki biletleriň bahasy 24 ýewrodan başlap, 950 ýewro çenlidir. 1 milliona golaý biletiň amatly bahadan ýerlenmegi meýilleşdirilýär. Ähli biletleriň ýarysyna golaýy 50 ýewrodan satylar, üçden bir bölegi 100 ýewrodan ýerlener.
Galan biletleriň 15 göterimi bolsa iň ýokary bahadan satylar. Olimpiýa oýunlarynyň açylyş we ýapylyş dabaralarynyň biletleri aýratyn satylar.
Biletleriň satuwy 2022-nji ýylyň dekabrynda başlanar. 2023-nji ýylyň fewralyndan tomaşaçylar 3 sany aýry ýaryş üçin bir bilet satyn alyp biler we onuň bahasy 72 ýewrodan bolar.
ALTYN MEDAL UGRUNDAKY ILKINJI ÝARYŞ
Şeýle hem Olimpiýa oýunlarynyň guramaçylyk komiteti sport ýaryşlarynyň geçirilýän senesini we wagtyny kesgitledi. Altyn medal ugrundaky ýaryşlar 27-nji iýulda başlanar. Şol gün türgenler dzýudo, gylyçlaşmak, welosiped sporty, skeýtbording, suwda ýüzmek, suwa bökmek, regbi we ok atmak ýaly sport görnüşlerinde altyyn medaly gazanmak üçin bäsleşerler.
Olimpiýa oýunlarynyň ýapylyş güni, ýagny 11-nji awgustda sportuň göreş, ýeňil atletika (marafon), agyr atletika, basketbol, trek, gandbol ýaly görnüşleri boýunça medal ugrunda bäsleşikler geçiriler.
Bilşiňiz ýaly, Pariždäki Olimpiýa oýunlayr 2024-nji ýylyň 26-njy iýuly-11-nji awgusty aralygynda geçiriler. Paralimpiýa oýunlary bolsa, şol ýylyň 28-nji awgusty-8-nji sentýabry aralygynda guralar.