2034-nji ýylda futbol boýunça dünýä çempionaty Saud Arabystany Patyşalygynda geçiriler. Bu barada Halkara Futbol Federasiýasynyň prezidenti Janni Infantino jemgyýetçilik tory arkaly habar berdi.
– 2026-njy ýylda ajaýyp futbol baýramçylygy bolar. Kanada, Meksika we ABŞ – Demirgazyk Amerikada dünýä çempionatyny gurnar. 2030-njy ýyldaky çempionat bolsa, Afrikada (Marokko) we Ýewropada (Portugaliýa we Ispaniýa) geçiriler. Onuň 3 sany baýramçylyk duşuşyklary Günorta Amerikada (Argentina, Paragwaý we Urugwaý) geçiriler. 2034-nji ýylda dünýä çempionaty Saud Arabystanyda bolar. Öňde boljak 3 dünýä çempionaty 5 yklymda we 10 döwletde geçiriler. Bu hem futboly hakykatdan hem ählumumy derejä çykarýar – diýip, Infantino belleýär.
31-nji oktýabrda Awstraliýa 2034-nji ýylda geçiriljek dünýä çempionatyny kabul etmek üçin dalaşgär bolmakdan ýüz öwürdi.
Halkara futbol Federasiýasy Aziýanyň Futbol Konfederasiýasyny we Okeaniýanyň Futbol Konfederasiýasyny 2034-nji ýylda dünýä çempionatyny guramaga çagyrdy. Şonuň yzysüre Saud Arabystany bu ýaryşy gurnamak üçin ýüz tutdy.