2028-nji ýylyň UEFA-nyň Superkubogy ugrundaky duşuşyk Astanada geçiriler. Bu baradaky karar Ýewropa futbol assosiýasiýalary birleşiginiň (UEFA) Saloniki şäherinde geçirilen Ýerine ýetiriji komitetiniň mejlisinde kabul edildi.
Oýun “Astana Arena” stadionynda geçiriler, oňa 2027/28 möwsüminiň Çempionlar ligasynyň we Ýewropa ligasynyň ýeňijileri gatnaşar.
2027-nji ýylda UEFA Superkubogy ugrundaky duşuşyk Amsterdamyň “Ýohan Kroýf Arena” stadionynda geçiriler.
Gazagystan ilkinji gezek Ýewropa klub ýaryşynyň kubogy ugrundaky duşuşygy kabul eder.
“Astana Arena” 2009-njy ýylda açyldy, stadionyň orun sany 30,2 müň janköýere niýetlenendir. Bu futbol meýdançasy “Astana” kluby we Gazagystanyň milli ýygyndysynyň stadiony bolup durýar.