Türkmenistanyň Prezidenti Wladimir Putine saýlawlarda gazanan ýeňşi we Russiýa Federasiýasynyň Prezidenti wezipesine gaýtadan saýlanmagy mynasybetli tüýs ýürekden gutlaglaryny iberdi. Bu barada “Watan” habarlar gepleşiginde habar berildi.
– Bu wezipä gaýtadan saýlanmagyňyz Size bildirilen ýokary ynamyň we ýurduňyzyň öňünde bitiren hyzmatlaryňyzyň görkezijisi bolup durýar. Siziň ýolbaşçylygyňyzda ýurduň ykdysadyýetiniň mundan beýläk-de gülläp ösjekdigine, şeýle hem Russiýanyň ähli halkynyň öňe gitjekdigine we abadançylygynyň üpjün ediljekdigine ynanýaryn.
Siziň ukyp-başarnygyňyz hem-de baý syýasy tejribäňiz Türkmenistan bilen Russiýa Federasiýasynyň arasyndaky özara bähbitli hyzmatdaşlygy mundan beýläk-de giňeltmäge hyzmat eder. Biziň ýurtlarymyzyň örän giň ugurlar boýunça netijeli hyzmatdaşlygyny we ysnyşykly özara gatnaşyklaryny aýdyň görkezýän ikitaraplaýyn türkmen-russiýa gatnaşyklarynyň ýokary derejesini bellemek guwandyryjydyr.
Biz Türkmenistanda ikitaraplaýyn gatnaşyklary ösdürmäge Siziň goşýan şahsy goşandyňyzy ýokary baha berýäris – diýip, döwlet Baştutanymyz hatynda belledi we iki halkyň bähbidine hyzmatdaşlygy mundan beýläk-de giňeltmek boýunça bilelikdäki netijeli işleri dowam etdirmäge taýýardygyny beýan etdi.