2024-nji ýylyň 10-11-nji sentýabrynda Aşgabat şäherindäki «Ýyldyz» myhmanhanasynda Türkmenistanyň maýa goýum forumy we onuň çäklerinde ugurdaş sergi geçiriler. Ýurdumyzyň ykdysadyýetiniň dürli pudaklaryndaky baý maýa goýum mümkinçiliklere bagyşlanyp geçiriljek foruma dünýäniň dürli döwletlerinden ýüzlerçe wekiliň gatnaşmagyna garaşylýar.
Forumyň çäklerinde Türkmenistanyň Söwda-senagat edarasy tarapyndan ýurdumyzyň söwda, ýangyç-energetika, gurluşyk senagaty, ulag-kommunikasiýa, oba hojalyk toplumlarynda, saglyk, bilim, sport, maliýe-bank ulgamlarynda bar bolan mümkinçiliklere bagyşlanan sergi guralar. Onda ugurdaş düzümleriň edara-kärhanalary geljegi uly türkmen bazarynyň mümkinçilikleri, maýa goýum taslamalary bilen tanyşdyrarlar.
Türkmenistanyň ykdysadyýetiň dürli ugurlaryndaky baý serişde kuwwatlyklary we ondan netijeli peýdalanmak üçin döredilen amatly maýa goýum syýasaty daşary ýurtly hyzmatdaşlarda uly gyzyklanma döredýär. Öňde boljak maýa goýum forumy we onuň çäklerindäki sergi ýurdumyzda durmuşa geçirilýän iri taslamalara daşary ýurt maýalaryny çekmek we özara bähbitli hyzmatdaşlygy mundan beýläk hem ösdürmek üçin giň mümkinçilikleri döreder.