2024-nji ýylyň 12-nji dekabrynda Türkmenistanyň daşary işler ministri Raşid Meredow Eýran Yslam Respublikasynyň daşary işler ministriniň hukuk we halkara meseleler boýunça orunbasary Kazem Garib-Abadiniň ýolbaşçylygyndaky wekiliýet bilen duşuşdy.
Duşuşykda taraplar türkmen-eýran gün tertibindäki häzirki meseleleri ara alyp maslahatlaşdylar. Diplomatlar hoşniýetli goňşuçylyk we birek-birege hormat goýmak ýörelgelerinde hyzmatdaşlygyň ösdürilmegini tassykladylar.
Söhbetdeşler söwda we ykdysady gatnaşyklaryň, hususan-da, energetika we ulag pudagynyň ösüşine garadylar. Şunuň bilen baglylykda, Hökümetara türkmen-týran ykdysady hyzmatdaşlyk geňeşiniň işiniň ähmiýeti nygtaldy.
Mundan başga-da, taraplar halkara we sebit guramalarynyň çäginde hyzmatdaşlygyň netijeliligini kanagatlanma bilen bellediler.