Täjigistanyň daşary işler ministri Sirojiddin Muhriddiniň ýolbaşçylygyndaky wekiliýeti üç günlük sapar bilen Aşgabada geldi.
Saparyň esasy maksady — iki ýurduň daşary syýasat edaralarynyň arasynda syýasy geňeşmeleri geçirmekden ybaratdyr.
Myhmanlar saparyň maksatnamasyny Türkmenistanyň Söwda-senagat edarasyndan başladylar. Sirojiddin Muhriddin we wekiliýetiň agzalary «Kids Expo: Ähli zat çagalar üçin» atly halkara sergi-ýarmarkasynyň ekspozisiýasy bilen tanyşdylar. Sergi bilim, dynç alyş we çagalar senagaty ulgamynda öňdebaryjy işläp taýýarlamalary görkezýän çagalar harytlaryny hem-de hyzmatlaryny öndürijileri birleşdirdi.
Soňra täjik wekiliýeti Türkmenistanyň Garaşsyzlyk binasyna baryp gördi we ol ýerde Garaşsyzlyk binasyna gül goýdular.
Wekiliýet agzalary Köpetdagyň eteginde ýerleşýän «Magtymguly Pyragy» medeni-seýilgäh toplumynda hem bolup, täjik şahyry Saýido Nasafiniň ýadygärligine gül goýup, ony sarpaladylar.
Saparyň birinji gününiň maksatnamasyna Halkara Aşgabat atçylyk-sport toplumyna baryp görmek hem girdi.
Täjigistanyň wekiliýetiniň Aşgabada sapary 21-nji awgusta çenli dowam eder.