12-nji aprelde sowet kosmonawty Ýuriý Gagariniň älem giňişligine uçmagynyň 60 ýyllygy mynasybetli Ýer ýüzüniň dürli döwletlerinde köp sanly ýatlama çäreleri geçirildi.
Şolaryň arasynda ilkinji kosmonawtyň Watanyndaky ― Russiýadaky çäreler şowhunlylygy we täsinligi bilen özüne çekýär. Ynha, ýurduň Beýik Nowgorod şäherinde Ýuriý Gagariniň älem giňişligine çykmagynyň 60 ýyllygy mynasybetli agşamky asmany dron kameralarynyň ajaýyp görnüşi bezedi.
Has takygy, rus metbugatynyň habar berşi ýaly, şäherde 500-den gowrak dron kamerasy arkaly «Wostok» älem gämisiniň we onuň emeli hemralarynyň şekili emele getirildi. Bu görnüş ýurduň we dünýä döwletleriniň ençemesiniň teleýaýlymlary arkaly göni ýaýlymda alnyp görkezildi.