Emre Belezoglu Türkiýäniň «Fenerbahçe» futbol klubunyň baş tälimçisi wezipesine bellenildi. Bu barada klubuň resmi saýtynda habar berilýär.
Şertnamanyň möhleti barada maglumat berilmedi.
46 ýaşly Belezoglunyň soňky işlän ýeri 2025-nji ýylyň dekabryndan bäri ýolbaşçylyk edip gelen «Kasympaşa» toparydyr. Ol mundan ozal «Stambul Başakşehir», «Ankaragüjü» we «Antalýaspor» toparlarynda hem baş tälimçi bolup işledi.
Belezoglu 2020-nji ýylda «Fenerbahçe» toparynyň düzüminde futbolçylyk karýerasyny tamamlady. Şol ýylyň awgust aýyndan 2021-nji ýylyň iýun aýyna çenli klubuň sport direktory wezipesinde işledi. 2021-nji ýylyň mart aýyndan iýun aýyna çenli bolsa toparyň baş tälimçisiniň wezipesini wagtlaýyn ýerine ýetirdi.
Belezoglu futbolçy hökmünde Türkiýäniň «Galatasaraý» we «Stambul Başakşehir», Italiýanyň «Inter», Angliýanyň «Nýukasl» hem-de Ispaniýanyň «Atletiko» toparlarynda hem çykyş etdi.
Ol «Galatasaraýyň» düzüminde 2000-nji ýylda UEFA-nyň kubogyny we Superkubogyny gazandy. Şeýle hem Türkiýäniň milli ýygyndysynyň düzüminde 2002-nji ýylda geçirilen futbol boýunça dünýä çempionatynyň bürünç medalyna mynasyp boldy.