Türkmenistanyň Döwlet gümrük gullugynyň başlygynyň orunbasarynyň ýolbaşçylygyndaky wekiliýet Bütindünýä gümrük guramasynyň Geňeşiniň 141-nji/142-nji mejlislerine gatnaşdy. Çäreler Guramanyň Belgiýanyň Brýussel şäherinde ýerleşen ştab-kwartirasynda geçirildi.
Bütindünýä gümrük guramasynyň Geňeşi – bu Guramanyň iň ýokary karar çykaryjy edarasy bolup, ol öz mejlislerini her ýyl geçirýär. Mejlislerde agza döwletleriň gümrük edaralary tarapyndan ulanylmagy üçin degişli çözgütler kabul edilýär. 2023-nji ýylyň mejlisinde Guramanyň Baş sekretarynyň hem-de Geňeşiň başlyklygyna dalaşgärleriň saýlawy geçirildi.
Geçirilen saýlawyň netijeleri boýunça Guramanyň täze Baş sekretary hökmünde ABŞ-dan jenap Ýan Sanders we Geňeşiniň başlygy wezipesine Günorta Afrikanyň girdejiler gullugynyň komissary jenap Edward Kiswetter saýlandy.
Türkmenistan Bütindünýä gümrük guramasynyň agzalylygyna 1993-nji ýylda kabul edildi. Häzirki wagtda 185 döwlet onuň agzasy bolup durýar. Bu döwletleriň dörtden üç bölegi dünýä söwdasynyň 98%-den gowragyny amala aşyrýar.
Türkmenistan bilen Bütindünýä gümrük guramasynyň arasyndaky hyzmatdaşlyk soňky birnäçe ýylyň dowamynda ösýän häsiýete eýedir. 2021-nji we 2023-nji ýyllarda Türkmenistan Bütindünýä gümrük guramasynyň iki sany halkara konwensiýalarynyň agzalylygyna kabul edildi.