Fransiýanyň «Pari Sen-Žermen» (PSŽ) toparynyň futbolçylary Çempionlar ligasynyň umumy tapgyrynyň dördünji aýlawynda Ispaniýanyň «Wilýarreal» toparyna garşy myhmançylykda geçirilen duşuşykda 17 minutyň dowamynda dört gol geçirip, ýaryşyň täze rekordyny goýdular.
Çempionlar ligasynda iň gysga wagtyň içinde dört gol geçirmek boýunça ozalky rekord Ispaniýanyň «Real» toparyna degişlidi. 2011-nji ýylyň noýabr aýynda bu topar Horwatiýanyň Zagrebiň «Dinamo» toparyna garşy geçirilen duşuşygyň ilkinji 20 minutynda dört gezek tapawutlanypdy.
PSŽ-niň düzüminde Žoau Neweş (9-njy minut), Dezire Due (12-nji minut), Senni Meýulýu (13-nji minut) we Fabian Ruis (17-nji minut) gol geçirmegi başardylar.
ÝAMALYŇ REKORDY
Ispaniýanyň «Barselona» toparynyň hüjümçisi Lamin Ýamal 20 ýaşyna ýetmedik futbolçylaryň arasynda Çempionlar ligasynda iň köp gol geçirmek boýunça täze rekord goýdy.
Ol bu üstünligi Çempionlar ligasynyň umumy tapgyrynda Angliýanyň «Aston Willa» toparyna garşy öz meýdançasynda geçirilen duşuşykda gazandy. Ýamal duşuşygyň 7-nji minutynda hasaby açdy. Bu gol 19 ýaşly futbolçynyň Çempionlar ligasyndaky 14-nji goly boldy.
Mundan ozal Ýamal bu görkeziji boýunça dünýä çempionatlarynyň taryhynda iň köp gol geçiren futbolçy, Ispaniýanyň «Real» toparynyň fransiýaly hüjümçisi Kilian Mbappe bilen birinji orny paýlaşýardy.
Lamin Ýamal Çempionlar ligasynda jemi 37 duşuşyk geçirdi. Kilian Mbappe bolsa 20 ýaşyna ýetýänçä bu ýaryşda 23 duşuşyga gatnaşypdy.
NOÝER MESSIDEN ÖŇE GEÇDI
Germaniýanyň «Bawariýa» futbol klubunyň derwezebany Manuel Noýer Çempionlar ligasynyň taryhynda iň köp duşuşyk geçiren futbolçylaryň sanawynda üçünji orna çykdy.
Çempionlar ligasynyň umumy tapgyrynyň dördünji aýlawynda Ispaniýanyň «Atletiko» toparyna garşy myhmançylykda geçirilen duşuşyk Noýer üçin bu ýaryşdaky 164-nji oýun boldy.
Bu görkeziji boýunça ol sekiz gezek «Altyn top» baýragyna mynasyp bolan argentinaly Lionel Messiden we germaniýaly Tomas Müllerden öňe geçdi.
Şeýlelikde, Manuel Noýer Çempionlar ligasynda iň köp duşuşyk geçiren nemes futbolçylarynyň arasynda ýeke-täk rekord eýesi boldy.
BATRAKOWDAN TÄZE ÜSTÜNLIK
Türkiýäniň «Galatasaraý» toparynyň ýarymgoragçysy Alekseý Batrakow soňky 11 ýylyň dowamynda Çempionlar ligasynyň bir duşuşygynda iki gol geçirmegi başaran ilkinji russiýaly futbolçy boldy.
Ol bu üstünligi Çempionlar ligasynyň umumy tapgyrynda Germaniýanyň «Ştutgart» toparyna garşy öz meýdançasynda geçirilen duşuşykda gazandy.
Mundan ozal Çempionlar ligasynyň bir duşuşygynda iki gezek tapawutlanan soňky russiýaly futbolçy hüjümçi Artýom Dzýuba bolupdy. Ol 2015-nji ýylyň noýabr aýynda Sankt-Peterburgyň «Zenit» toparynyň düzüminde Fransiýanyň «Lion» toparyna garşy myhmançylykda geçirilen duşuşykda iki gol geçiripdi. Şol duşuşyk «Zenitiň» 2:0 hasabyndaky ýeňşi bilen tamamlanypdy.
Çempionlar ligasy Ýewropanyň iň abraýly klub futbol ýaryşydyr. Bu ýaryşyň soňky iki möwsüminde Fransiýanyň «Pari Sen-Žermen» (PSŽ) topary ýeňiji boldy.