Türkmenistanyň Söwda-senagat edarasynda «Türkmenistanyň nebiti we gazy — 2026» (OGT 2026) atly halkara maslahaty geçirildi. OGT-2026 forumyna dünýäniň 75 döwletinden 1400-den gowrak wekiliýet gatnaşýar.
“Ata Watan Media” toparynyň gatnaşan halkara maslahatynyň ilkinji plenar mejlisi «Türkmenistanyň energetika strategiýasy: sebitara arabaglanyşyk we halkara hyzmatdaşlygy» ady bilen geçirildi.
«APCO Worldwide» kompaniýasynyň Ýakyn Gündogar we Demirgazyk Afrika sebiti boýunça başlygy Jon Defteriosyň alyp barmagynda geçirilen plenar mejlisde Türkmenistanyň Ministrler Kabinetiniň Başlygynyň orunbasary Guwanç Agajanow, Malaýziýanyň ykdysadyýet ministri Akmal Nasrullah bin Mohd Nasir, Birleşen Milletler Guramasynyň Türkmenistandaky Hemişelik utgaşdyryjysy Sýaoszýun Greýs Wan, «PETRONAS» kompaniýasynyň «Upstream» ugry boýunça ýerine ýetiriji wise-prezidenti we Baş dolandyryjy direktory Mohd Jukris Abdul Wahab, «XRG» (ADNOC) kompaniýasynyň işewürligi ösdürmek boýunça
direktory Abdulla Al Şamsi, «Dragon Oil» kompaniýasynyň Baş ýerine ýetiriji direktory Abdulkarim Al-Maazmi çykyş etdiler.
Maslahatyň açylyş umumy mejlisinde çykyş eden Türkmenistanyň Ministrler Kabinetiniň Başlygynyň orunbasary Guwanç Agajanow ýurduň ýangyç-energetika toplumyny ösdürmekde gazanylan esasy netijeler we strategik ileri tutulýan ugurlar barada maglumat berdi.
«Galkynyş» ägirt uly gaz känini özleşdirmek
Energetika syýasatynyň esasy ugurlarynyň biri dünýäniň iň iri gaz känleriniň hataryna girýän «Galkynyş» gaz känini tapgyrlaýyn özleşdirmek bolup galýar.
2026-njy ýylyň aprelinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hut özüniň gatnaşmagynda bu gaz känini özleşdirmegiň giň gerimli dördünji tapgyryna dabaraly ýagdaýda badalga berildi.
Taslama Türkmenistanyň döwlet serişdeleriniň hasabyna maliýeleşdirilýär we häzirki wagtda Hytaýyň CNPC kompaniýasynyň gatnaşmagynda işjeň durmuşa geçirilýär.
TOPH strategik taslamasy
Türkmenistan — Owganystan — Pakistan — Hindistan (TOPH) transmilli gaz geçirijisi hem esasy üns merkezinde bolmagynda galýar.
Wise-premýeriň bellemegine görä, gaz geçirijiniň Türkmenistanyň Serhetabat şäherinden Owganystanyň Hyrat welaýatyna çenli uzalýan möhüm böleginiň gurluşygy tamamlaýjy tapgyra gadam basdy.
Çylşyrymly daglyk şertlere we ýer üstüniň aýratynlyklaryna garamazdan, bu bölekdäki gurluşyk işleri «Türkmengaz» döwlet konserniniň güýji bilen üstünlikli alnyp barylýar.
Malaýziýa bilen hyzmatdaşlygy berkitmek we deňiz ýataklary boýunça täze şertnamalar
Şu ýylyň möhüm wakalarynyň biri Malaýziýa bilen hyzmatdaşlygyň ösdürilmegi boldy.
2026-njy ýylyň iýun aýynda ýokary derejedäki saparyň çäklerinde Türkmenistanyň Prezidenti Serdar Berdimuhamedow bilen Malaýziýanyň Premýer-ministri Anwar Ibrahimiň gatnaşmagynda Hazar deňzindäki 19–20-nji deňiz blogy boýunça önümi paýlaşmak hakynda täze ylalaşyga gol çekildi.
Petronas kompaniýasy eýýäm bu taslamany iş ýüzünde durmuşa geçirmäge girişdi.
Mundan başga-da, Malaýziýanyň beýleki degişli düzümleri bilen hyzmatdaşlyk giňeldilýär. Hususan-da, OGT 2026 maslahatynyň çäklerinde Malaýziýa tarapy bilen özara düşünişmek hakynda Ähtnama gol çekiljekdigi mälim edildi.
Şanly seneler we halkara hyzmatdaşlyk
Wise-premýer 2025–2026-njy ýyllarda Türkmenistanyň strategik hyzmatdaşlyk gatnaşyklary bilen bagly birnäçe möhüm şanly seneleri belleýändigini ýatlatdy.
Şolaryň hatarynda Dragon Oil kompaniýasynyň sebitde üstünlikli işlemeginiň 25 ýyllygy, Türkmenistan bilen Hytaýyň arasyndaky strategik hyzmatdaşlygyň 20 ýyllygy, şeýle hem Malaýziýa bilen hyzmatdaşlyk gatnaşyklarynyň 30 ýyllygy bar.
Türkmenistanyň Ministrler Kabinetiniň Başlygynyň orunbasary G. Agajanow öz çykyşynda özara bähbitli hyzmatdaşlyk üçin daşary ýurtly hyzmatdaşlara, maýadarlara we dünýäniň öňdebaryjy energetika kompaniýalaryna minnetdarlyk bildirdi.
Ol Türkmenistanyň täze iri möçberli başlangyçlar üçin açykdygyny we energetika pudagynda köptaraplaýyn dialogy mundan beýläk-de giňeltmäge taýýardygyny nygtady.