Ýurdumyzda möwsümleýin ýiti respirator ýokanç keselleriň öňüni almak bilen bagly birnäçe işler alnyp barylýar. Olar bilen bagly birnäçe wagyz-nesihat işleri hem yzygiderli geçirilip, köpçülikleýin habar beriş serişdeleriniň üsti bilen lukmanyň maslahatlary halkymyza ýetirilýär. Ynha şeýle oňyn maslahatlaryň biri hem «Türkmenistan» gazetinde şu ýylyň mart aýynyň 6-syna Türkmenistanyň Saglygy goraýyş we derman senagaty ministrligi tarapyndan çap edildi. Onda aşakdaky maslahatlar berilýär.
— hökman lukman bilen maslahatlaşyp, gyzyl burç ýa-da sarymsak goşulan unaş bilen iýmitlenmeli. Sarymsak we burç bedeniň kesele garşy göreş ukybyny ýokarlandyrmaga ýardam berýän biologik işjeň maddalara baýdyr;
— dümewiň ilkinji alamatlary ýüze çykan ýagdaýynda, hökman maşgala lukmanyna ýüz tutmaly;
— burnuň nemli bardasyna oksolin melhemini çalmaly;
— pasyllara görä geýinmeli;
— C witaminine baý önümler bilen iýmitlenmeli;
— iş ýerinde we öý otaglarynda wagtal-wagtal penjireleri açyp, howanyň tämiz bolmagyny üpjün etmeli;
— beden taýdan işjeňligi ýokarlandyrmaly we sport bilen meşgullanmaly;
— asgyrylanda we üsgürilende, hökman elýaglyk bilen agzyňy we burnuňy ýapmaly;
— elleriňizi elmydama arassa saklamaly, onuň üçin nahar iýmezden öň we soň, hajathanadan, daşardan geleniňizden soň, elleriňizi sabyn bilen ýuwmaly;
— derman serişdelerini lukman bilen maslahatlaşman, özbaşdak kabul etmeli däl. Bu esasan hem, antibakterial serişdelerine degişlidir;
— Türkmenistanda ösýän dermanlyk ösümliklerinden taýýarlanan melhem çaýlaryny kabul ediň;
— möwsümleýin keselleriň öňüni almak üçin maşgala lukmany bilen maslahatlaşyp, öňüni alyş sanjymlaryny öz wagtynda etdiriň!