2026-njy ýylyň 21-nji ýanwarynda Aşgabat şäherinde, Türkiýäniň Türkmenistandaky Ilçihanasynyň Medeniýet merkezinde ýakynda döredilen we her ýylyň 15-nji dekabrynda bellenilýän Bütindünýä türki diller maşgalasy gününe bagyşlanan çäre geçirildi.
Bu çäre 2025-nji ýylyň noýabr aýynda Samarkantda geçirilen ÝUNESKO-nyň Baş konferensiýasynda kabul edilen taryhy çözgüdiň — 15-nji dekabryň türk dilleri maşgalasynyň halkara güni hökmünde resmi taýdan yglan edilmeginiň — türk dünýäsindäki ilkinji çäreleriniň biri boldy. Türkiýäniň Ilçihanasy tarapyndan guralan Aşgabatdaky dabara diplomatlar, köpçülikleýin habar beriş serişdeleriniň wekilleri, bilermenler we resmi adamlar gatnaşdy.
Türkiýäniň Türkmenistandaky ilçisi Ahmet Demirokuň gurnamagynda geçirilen dabara gatnaşyjylaryň hatarynda Türkmenistanyň medeniýet ministriniň ournbasary Nursähet Şirimow, Azerbaýjanyň Türkmenistandaky ilçisi Gismet Gozalow, Gazagystanyň Türkmenistandaky ilçisi Nurlan Nogaýew, Gyrgyzystanyň Türkmenistandaky ilçisi Azizbek Madramow, Özbegistanyň Türkmenistandaky ilçihanasynyň geňeşçisi Žasur Aşurow we beýlekiler bar.
Türkiýäniň Türkmenistandaky ilçisi Ahmet Demirok öz çykyşynda türk dilleri maşgalasyny «biziň umumy taryhymyzy, medeniýetimizi we siwilizasiýamyzy baglanyşdyrýan iň berk baglanyşyk» diýip atlandyrdy.
Türkmenistanyň medeniýet ministriniň orunbasary Nursähet Şirimow bolsa öz çykyşynda Türkmenistanyň türk döwletleri bilen, aýratyn-da medeni ugurda gatnaşyklarynyň işjeň ösdürilýändigi barada durup geçdi. Şeýle hem ol TÜRKSOÝ-yň kararyna laýyklykda, Magtymguly Pyragynyň doglanlygynyň 300 ýyllygy bellenilýän 2024-nji ýylda Änew şäheriniň türki dünýäsiniň medeni paýtagty diýlip yglan edilendigini ýatlatdy.