Hytaý Inženerçilik Korporasiýasynyň (CAMCE) we “China Machinery Engineering Corporation” korporasiýasynyň (CMEC) dolandyryş geňeşiniň başlygy Wan Bo iş sapary bilen Türkmenistanda boldy. Saparyň çäklerinde infrastruktura, energetika we senagat ugurlarynda ikitaraplaýyn hyzmatdaşlygy berkitmäge gönükdirilen ýokary derejeli iş duşuşyklary geçirildi. Bu barada “CAMCE” kompaniýasynyň metbugat gullugy habar berýär.
Hytaý Inženerçilik Korporasiýasy CAMCE we CMEC döwlet korporasiýasy SINOMACH-yň düzümine girýär. Bu kompaniýa Hytaýyň iň iri kärhanalarynyň biridir we merkezi hökümete gönüden-göni tabyn bolýar. SINOMACH-da 130 müňden gowrak işgär bar we 40-dan gowrak şahamçasy hereket edýär. Köp ýyllaryň dowamynda kompaniýa Hytaýyň 100 iň iri maşyn gurluşyk kärhanasynyň arasynda öňdäki orunlary eýeleýär.
Wise-premýer Mämmethan Çakyýew bilen duşuşyk (ulag-aragatnaşyk ulgamy)
Türkmenistanyň Ministrler Kabinetiniň Başlygynyň ulag-aragatnaşyk ulgamyna gözegçilik edýän orunbasary Mämmethan Çakyýew bilen geçirilen duşuşykda Wan Bo SINOMACH-yň taryhy we gurluşy, esasy iş ugurlary hem-de Merkezi Aziýada durmuşa geçirilen üstünlikli taslamalar barada gürrüň berdi.
Hytaý tarapy infrastruktura we senagat gurluşygy, şeýle hem maýa goýum we potratçylyk taslamalarynyň ähli tapgyrlarynda “tayýar görnüşde” hyzmatlary bermek babatda giň hyzmatdaşlyga taýýardygyny bildirdi. Duşuşykda “Beýik Ýüpek ýolunyň täzeden galkynyşy” strategiýasyna goşant goşmak we “Bir guşak — bir ýol” başlangyjyny ýokary hilli hyzmatdaşlyk arkaly durmuşa geçirmek meselesine aýratyn üns berildi.
Mämmethan Çakyýew Türkmenistanda ulag infrastrukturasynyň ösüşi, pudagyň elektrifikasiýasy we alnyp barylýan özgertmeler barada giňişleýin maglumat berdi. Ol CMEC kompaniýasynyň taslama taýýarlamak, gurmak we maliýeleşdirmek babatdaky hünär derejesini ýokary baha berdi we Hytaý hyzmatdaşlarynyň ulag pudagyndaky möhüm desgalaryň amala aşyrylmagyna işjeň gatnaşmagyna umyt bildirdi.
Wise-premýer Baýmyrat Annamämmedow bilen duşuşyk
Energetika, gurluşyk we senagat ugurlaryna gözegçilik edýän Ministrler Kabinetiniň Başlygynyň orunbasary Baýmyrat Annamämmedow bilen geçirilen gepleşiklerde Wan Bo SINOMACH-yň güýçli ylmy-barlag kuwwatyny, öňdebaryjy tehnologiýalaryny we iri senagat taslamalaryny amala aşyrmakdaky tejribesini aýratyn belledi.
Hytaý wekiliýeti infrastruktura, senagat gurluşygy we nebit-gaz himiýasy ugurlarynda uzak möhletli hyzmatdaşlyga gyzyklanma bildirdi.
Baýmyrat Annamämmedow öz gezeginde, Türkmenistanda senagatyň ösüş dinamikasy we ileri tutulýan maýa goýum mümkinçilikleri bilen tanyşdyrdy. Ol Hytaýyň öňdebaryjy tejribesiniň, tehnologik mümkinçilikleriniň we inženerçilik mümkinçilikleriniň bilelikdäki taslamalarda peýdalanylmagynyň möhüm ähmiýete eýedigini aýtdy. Bu işler ýurduň senagatlaşdyrmak we ykdysadyýetini diwersifikasiýalaşdyrmak strategiýasyna hyzmat eder diýip nygtady.
Hytaýyň Türkmenistandaky Ilçisi bilen duşuşyk
Wan Bo, şeýle hem Hytaýyň Türkmenistandaky Adatdan daşary we Doly ygtyýarly Ilçisi Szi Şumin we söwda-ykdysady geňeşçi Li Ýue bilen duşuşyk geçirdi. Kompaniýanyň wekilleri SINOSURE (Hytaý Eksport karzlaryny ätiýaçlandyryş Korporasiýasy) we CMEC inženerçilik toparynyň Türkmenistana saparynyň maksadynyň ýurduň ykdysady ösüşiniň häzirki ýagdaýyny, bazar mümkinçiliklerini öwrenmek we degişli ugurlarda bilelikdäki taslamalaryň öňe ilerlemegine ýardam bermekdigini aýtdylar.
Ilçi Şumin Hytaý bilen Türkmenistanyň arasyndaky hyzmatdaşlygyň ýagdaýy barada giňişleýin maglumat berdi. Diplomat ŞHG sammitiniň çäginde iki ýurduň ýolbaşçylarynyň sentýabr aýyndaky duşuşygynyň oňyn netijelerini, hususan-da, tebigy gaz we beýleki ugurlardaky üstünlikleri belledi. Ol Hytaý kompaniýalarynyň Türkmenistanyň ösüş maksatnamalary bilen hereketlerini utgaşdyryp, “Bir guşak — bir ýol” başlangyjynyň amala aşyrylmagyna goşant goşmagyna umyt bildirdi.
Goşmaça duşuşyklar
Saparyň dowamynda Wan Bo we onuň kärdeşi Žen Žunpin ýolbaşçylygyndaky bilelikdäki iş topary Türkmenistanyň demir ýol ministri, “Türkmendehimýa” döwlet konserniniň başlygy, Daşary ykdysady iş boýunça Döwlet bankynyň başlygynyň orunbasary hem-de beýleki birnäçe duşuşyklar geçirdiler.
Bu sapar Hytaý işewürleriniň türkmen bazaryna bolan artýan gyzyklanmasyny we iki ýurduň ykdysadyýetiniň möhüm pudaklarynda strategik hyzmatdaşlygynyň derejesini tassyklaýar.