Hytaý Halk Respublikasy öňümizdäki 3 ýylyň dowamynda Merkezi Aziýa döwletleriniň ýaşlaryna 600 talyp haky, şeýle hem 1,5 müň hünärmeniň gaýtadan hünärini kämilleşdirmegini maliýeleşdirer. Bu barada Hytaýyň daşary işler ministri Wan I Syçuan welaýatynyň Çendu şäherinde geçirilen “Merkezi Aziýa – Hytaý” formatyndaky daşary işler ministrleriniň bäşinji duşuşygynda belläp geçdi.
Hytaýyň daşary syýasat edarasynyň habar bermegine görä, Wan I Merkezi Aziýa döwletleriniň daşary işler ministrleri bilen geçiren duşuşygyndna soňra gurnalan bilelikdäki metbugat ýygnagynda gazanylan ylalaşyklar barada durup geçdi.
Hytaýyň daşary işler ministri Wan I “Merkezi Aziýa – Hytaý” formatyndaky daşary işler ministrleriniň duşuşygynda syýasy, söwda-ykdysady we bilim ulgamynda oňyn netijeleriň gazanylandygyny habar berdi.
Ol bilim ulgamyndaky hyzmatdaşlygy pugtalandyrmak maksady bilen hünärmenleri taýýarlamak ugruna ähmiýet beriljekdigini belledi.
Hytaýyň ministri öňümizdäki 3 ýylyň dowamynda Hytaýyň Merkezi Aziýanyň ýaşlaryna 600 talyp haky hödürlenjekdigini belledi.
Mälim bolşy ýaly, golaýda Türkmenistanyň Bilim ministrligi Hytaýyň ýokary okuw mekdeplerinde 2025-2026-njy okuw ýyly üçin bakalawr maksatnamasy boýunça okamaga dalaşgärleri seçip alyş işine girişdi. Şunuň bilen baglylykda, 25-nji noýabrdan 10-njy dekabra çenli aralykda Halkara ynsanperwer ylymlary we ösüş uniwersitetinde dalaşgärlerden resminamalar kabul edilýär. 18 ýaşa ýeten we 25 ýaşdan uly bolmadyk raýatlary (Hytaýda okamak üçin) okuwa girmäge resminamalary tabşyrmaga hukuga eýedir. Iňlis diline erk etmek hem giriş synaglaryna gatnaşjaklar üçin zerur talapdyr.