Türkmenistan 2029-njy ýyla çenli tebigy gaz önümçiligini 116 milliard kubmetre ýetirmegi maksat edinýär. Bu barada Aşgabatda geçirilýän halkara nebitgaz forumynda “Tükrmengaz” döwlet konserniniň müdirliginiň başlygy Rustem Tekaýew belläp geçdi.
Onuň bellemegine görä, çykarylýan tebigy gazyň ýarysyndan gowragy eksporta niýetlenendir. «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna» laýyklykda, tebigy gazyň önümçiligini 116 milliard kubmetre ýetirmek maksat edinilýär.
Rustem Tekaýew häzirki wagtda “Tükrmengaz” döwlet konserni tarapyndan ykdysady ösüşe gönükdirilen taslamalary durmuşa geçirýändigini belledi. Olaryň hatarynda 118 kilometr uzynlygyndaky Şatlyk-Garagum gaç geçirijisiniň, 124 kilometr uzynlygyndaky Garagum-Malaý gaz geçirijisiniň, şeýle hem Baýip-Derýalyk we Döwletabat-Derýalyk gaz geçirijileriniň aralygynda 58.2 kilometr uzynlygyndaky gaz geçirijisiniň gurluşygy bar.