Hytaý Halk Respublikasynyň Başlygy Si Szinpiniň Gazagystanyň Prezidenti Kasym-Žomart Tokaýewiň hem-de Täjigistanyň Prezidenti Emomali Rahmonyň çakylygy boýunça bu ýurtlara döwlet sapary başlandy. Si Szinpin bu saparlarynyň ilkinji hökmünde Gazagystan Respublikasyna geldi.
Astana şäherindäki howa menzilinde Si Szinpini Prezident Kasym-Žomart Tokaýew garşy aldy. Gazagystan bilen Hytaýyň arasyndaky dostlugyň nyşany hökmünde resmi myhmanlary ellerinde iki ýurduň baýdaklary bolan çagalar garşy aldylar we olar hytaý dilinde aýdymlary ýerine ýetirdiler.
Si Szinpiniň bu saparynyň dowamynda ikitaraplaýyn duşuşyklar we birnäçe möhüm resminamalara gol çekmek göz öňünde tutulýar.
Şeýle hem HHR-iň Başlygy 4-nji iýulda Astana şäherinde geçiriljek Şanhaý Hyzmatdaşlyk Guramasynyň döwlet Baştutanlarynyň 24-nji mejlisine gatnaşar.
Hytaý Halk Respublikasynyň Başlygy Si Szinpin Gazagystan saparyny tamamlandan soňra Täjigistan Respublikasynda döwlet saparynda bolar.